الهاتف النقّال
2022.06.27
محمد قرفول- فينكس:
حبستك بقلب الهاتف النقـال
و انتي بمفاتيحو حبستيني
و صارت مفاتيحو متل أقفال
و نحنا بقلبو يا تقبريني
و قْطعتْ، تا نبقى، سوا الارسال
حتى تضلي وما تتركيني
و صرت كلما تخطري ع.البال
افتح الهاتف تا تشوفيني
و انْغَرَمْ فيكي هاتفي الجوال
تخمين صار يحس ياااعيني!
و يغار مني لو سجنّا طال
يحكي لحالو وما يحاكيني
و يوشوشك نسمة توشوش شال
و اسمع نهيدو عم بيكويني
كلما همستي وعطر صوتك سال
يسرق عطورك من شراييني
و يرجف ملبك هاتفي المحتال
يخنق الرنة وما يوعيني
افتح واسأل هالعطر شو قال
و لمّا بشوفك تاركي مرسال
تقولي يا ولفي ضل عني اسآل
عطرك بيوقع ندي عَ.جبيني