سهران..
2022.11.06
علم عبد اللطيف- فينكس
سهران..
تايبعّد عن عيونو الغَفا
سْراج الضّو
شرب زيتو وانطفا
ياريت الليل يحكي ياصبح
زوّدتا... كفا.
سهران حتى الصبح
ياصبح اتركو
نهدات صدرو
فوق صدرك يتّكو
يمكن عرف عينين
من لمّا بكو
جَرحو قلب
وسبقوه حتى
يشتكو.
سهران...
بلكي القلب بشي عتمة هرب
ياريت لو تقدر
بإيدك تمسكو.
*****
سهران...
تا يُهرُب من حكايات المنام
لو فيه ينسى بيوم
حكايات عام.
ياخد عيونو ع السلام
كان الغفا بيقول لَ حلمو
ابتعد
الليلة بلا ما تِتْعِبو
انت ارتاح عنّو. أو معو
يمكن اذا نِمتو سوا
بتتشاركو نفس المنام.
معليش ياحلم السهر
لو دِبْنا سوى كل العمر
لو تشعر شي ليلة بالنعس
يقلّك جفن دبلان
تعِبتْ كتير من طول الضنى
رَح نام يا صاحبي...
وياريت متلي تكتفي
تنيناتنا ننسى الأسى
بحلّفك بالّلي مضى
احملني معك بين الضلوع
اعملني الك نتفة دفا
ت قول لجرحي الشفا
ونام قبلي.. وبُوعِدَك..
بعدك بخطفة عين
رح قوم نام.