سلوك البحر!
2022.11.16
هاني حسن- فينكس
جربت مرة
راقب سلوك البحر
من ساعة بيوعى
وفكري أنا بينام
بالليل البحر
وسكون وعتم
والكهربا من الجو مقطوعة
طيب إذا بينام
شي ساعة البحر
وبتركن الموجات
حتى تجبر ضلوعا
وبكير يعني الكون
لاحق يشرب قداح الشمس
حتى الشمس
بكير لطلوعا
حتى بصراحة
كتير عادي
هيك يمرق يوم
دون ماتضبو الدني
بدرج إسبوعا
ماعاد عم نلمح فرق
مابين بكرا وبين
غيبات الأمس
شجرة ليالي مكررة
فروعا
جربت راقب هالبحر
كل مافرد إيديه
بيضيق الأفق
وبتحبس الغيمة البخيلة
كرجة دموعا
كل مافرد إيديه
ليقوم الصبح
صياد والسمكة الوحيدة
ماتت بجوعا
وع سفرة اللحظات
في شوية ملح
تارك أثر تحت الرمش
والعين مخدوعة
طيب أنا عنجد
ماعم إفهم سكون البحر
والريح عم تضرب
خدود الروح مفجوعة
لك ليش صامت يابحر
كدس جنونك فوق
قلبي وضمني
ساعة جنون بكل يوم
حقوق مشروعة