تعب الشتي
2022.12.06
هاني حسن- فينكس
تعب الشتي بالليل
وسمعت آناتو
والأرض قالتلو بعشق
كل التعب هاتو
قديش فيها من الأنانية
صور
لما الحرف يوصف معاناتو
لما القصيدة
تكون فكرتها جرح
والجرح حابس جرح جواتو
لما الورد ينحمل فوق الراس
لانو ورد
ويغتال زارع هالورد
ذاتو
بتبقى الدني
كمشة مشاعر بايتة
وقلوب ع كتر ماشربوا صبر
ماتوا
****
شيل القصيدة
والشعر ياقلب من بالك
كذبة إنت
وحكاية عهود الصداقة
لفقا خيالك
متل هامش حكي
بعدك إنت والهامش
شمالك
يمكن دواك تدير ضهرك
للأرض وتعيش
صامت
هيك أصفالك
وتغمض عيونك
ع حرقة
واقفة قبالك
وتلملم الخيبات
من كل الصدف
وتصير ذكرى بعتم
عرزالك