ما في فَرقْ
2022.12.12
فينكيس- محمد قرفول
من وين رح نخلق طرقْ
نمشي عليها بلا قلقْ
ما عاد في عنا فرقْ
من بعد م العمر انسرقْ
دروب كنا نعرفا
لا تخلص ولا نوقّفا
ياا غبن عمري اللي قفا
و. ع مفارقو قلبي احترقْ
كان الدرب ع الميلتين
معرّش عليه الياسمين
ميل ضحكة وميل عين
من فرحتا دمعا شرقْ
و الليلكة ع سياجنا
تغار كتر غناجنا
و تميل صوب دراجنا
تقطّف ترابين الحبقْ
كنا بعمر الولدنة
شو ضيقة علينا الدني
مراجيح عطر تهزني
وغصون مليانة ورقْ
واليوم إلنا شو بقي!
كم يوم من عمر الشقي؟!
يا ريت تبقي تمرقي
مطرح م محبوبك مرقْ
يمكن بآخر مرحلة
لما الحقيقة تنجلي
ما يضل يا روحي الي
آلا البكي ودمعة عرقْ!