حروف معتقة
2023.12.28
محمد قرفول- فينكس
صار الوقت ارتاح
من هم ل كْتابة
واخلص من الاشباح
ما ضل عندي جناح
تا رفرف وارتاح
تعْبت الاقداح
وتعّبت احبابي
يا مساكب المنتور ختيرتي
عطشتي ع كتر الجفا ودبلتي
بنت الشعر كنتي ، متل بنتي
طلعتي يا بنت الشعر كذابة/ي
لَبّستِكْ بلوزة ندى روحي
تشرب حنيني عطر ، وتفوحي
جروح العراوي بتشبه جروحي
وزرار فوق الصدر عنابي
وصرتي عروس بليلة الزفة
يبرد الليل وشعرك يدفي
يفرد عليكي شرشفو عفة
وينزلو النجمات خطابة
تعلقت فيكي من زغر سني
حروف شو عتقتها بدني
خمّر قوافي وتنسكب مني
دموع ورد ويشربا كتابي..