تنورة كلوش (قرادي)
2024.09.26
محمد قرفول- فينكس
بلوزة حنطية بعروق. بِنيّي وضيّق خلقا
والتنورة شلوق شلوق. والجدولة محترقة
البلوزة بزرين زغار. شعلتيلي قلبي بنار
خلي روحي كل نهار. تمرق ع زهورك مرقة
لبست تنورتها كلوش. والعطر عليها مفلوش
لما الدنيي تكون دغوش. من حدّي بتمرق سرقة
والتنورة كتر الغنج. شرشف عطر مخبا مرج
والضحكة عم تكرج كرج. وتزيد بقلبي الحرقة
نهداتي بعتّا مكاتيب. توديلك روحي وتجيب
تتزيديها عطر وطيب. طبعتي شفافك عالورقة
بغفى بتجيني بالحلم. من دون دستور ولا علم
بوعى، بيوعى عليي الظلم. بتكويني بنار الفرقة