ظلم الدني
2024.11.29
محمد قرفول
يا دنيا ليش عم بتعذبينا
وعليكي مش بخاطرنا اجينا
خلقنا غصب عنّا وما اخترنا
لا دين ولا اسامي ولا ذوينا
وجينا ع الدني وفيها انجبرنا
حرام تعاقبينا وتظلمينا
قَدَرنا هيك ما اخترنا قدرنا
شاب العمر دخلك قدرينا
كيف منعيش يا دنيا احترنا
وايّا درب نحنا سالكينا
مشينا بهالدروب وما نطرنا
ولا عرفنا يسارا من يمينا
تهْنا وقرّب زيادة اجلنا
وانتي طايرة ما بتنطرينا
حتى بلجة بحورك عبرنا
وبحارك كلها من دون مينا
اجيتي تحاسبينا عا عَملنا
جريمة بْدون ذنب تحاكمينا
يا ريت تخبرينا شو عْملنا
حتى بهالقساوة تعاملينا
خطايا ال قبلنا نحنا حملنا
عليها مش عدالة تعاقبينا
ابونا اكل تفاحة وظلمنا
دخيلك عن التفاح ابْعدينا
ونحنا لا سرقنا ولا قتلنا
ولا عا حقوق متيتم سطينا
ولا كفرنا بنعمة ولا بطرنا
ولا حقوق ال علينا ناكرينا
لبسنا الادب جبة من زغرنا
وعشنا لا اعتدينا ولا زنينا
مشينا ع الصراط وما زحلنا
وعلى محبة اهالينا ربينا
وهلق بعد ما شبنا وكبرنا
وعلى ظلمك تحملنا وصبرنا
جايي عا صبرنا تحاسبينا..؟!
بدل ما تحاسبينا كرمينا...!