ملتقى النهرين
2025.12.17
محمد قرفول
نشر الصديق يوسف احمد ٢٠١٨/١٢/١٥ صورة ﻻلتقاء نهرين (قيس والخوابي) بموقع يسمى (غبيط الملتقي) مع تعليق جميل فأجبته بمنادمة ارتجالية معلقا:
محمد قرفول:
كل م التقى نهرين ع سرير الغرام
وتعانقوا ومشيوا سوا بحب ووئام
بتحس كل تنين لو يتعانقوا
بتفيض ع الدنيا المحبة والسلام
.....اجاب يوسف:
بحس الوفا والحب عم يتسابقوا
كل ما نهرين بالوادي التقوا
وكل نهر شو جايب زهر عن ضفتو
يصيروا بماء الزهر عم يتراشقوا
.......فأجبته:
عا ضفة النهرين أحواض الورد
شي محترق بالشوق شي مات البرد
والعطر عم بيفوح ما بين التنين
يتحمم بنبعين طلو من الجرد
......وأضيف:
قيس التقى بليلاه عند الملتقي
وغير الشعر والحب منن ما بقي
يا زنبقة عا ضفتو بتتمايلي
ضلي ارقصي ورشي عطر تا تعرقي
- يوسف أحمد:
عاضفّة النّهرين زهر ومنتشي
شي من طلوع الضّو شي من الوشوشي
من طرطشات المي عَ كمام الزّهور
يتحمّموا الزّهرات من هالطّرطشي..
- محمد قرفول:
قيس التقى بليلاه عند الملتقي
غير الشعر والحب منن ما بقي
يا زنبقة عا ضفتو بتتمايلي
ضلي ارقصي ورشي عطر تا تعرقي..
- يوسف أحمد:
ضلّي ارقصي عَ ضفّتو ورشي عطر
تاتصير مي النهر أحلى من القطر
ونكتب غزل عن رقصتك عاضفّتو
منّك سطر يابوعلي ومنّي سطر..
- محمد قرفول:
يا نهر ماشي ب طريقو بلا وجل
يطرطش خصور الورد ويوزع قبل
منك سطر مني سطر ما في فرق
خلي القوافي تدوب ويطيب الغزل..
- يوسف أحمد:
خلّي القوافي تدوب بالشّلقة
ويتعانقوا النّهرين بالملقى
ويسرقواالبوسات مابين الظّلال
ويامَطيب البوسات بالسّرقة..
- محمد قرفول:
ﻻ تمد ايدك يا صديقي عالحرام
وﻻ تسرق البوسات بليالي الغرام
احلى اذا بيمر من حدك حلو
من عيون دبلانين يرميلك سلام..
- يوسف أحمد:
سرقة البوسة بشرع الله محلّلي
وكل قصّة حب مَنها مكلّلي
بْ بوسة وضمّة ومَرشقة وغنج وغزل
بتطلع القصّة (فالصو) يابوعلي..
...
منتلاقى بِهاليومين
بيكون الواحد رايق
هلّق رح يبدا التّقنين
باقي شي عشر دقايق