عطر جوعان.. (شروقي)
2026.05.01
محمد قرفول
سهرتي وصار العطر ع مخدتك جوعان
مشتاق خدك يجي ويزيد تعطيرو
خايف يطول السهر انتي وقمر نيسان
ويدبل فراش الورد ويزيد تعتيرو
ضلي حنين ودفا ع سريرك البردان
يسرق دفا جسمك تا يعرق سريرو
يفلش حرامو الزهر عا جسمك الشعلان
ورمان عم يشتهي ينامو نواطيرو
يشرب دموع الندي تا يرتوي الرمان
وعناب يشرب معو يسكر بتأثيرو
عا صدر مقلع عاج مطعّم بمرجان
يرشح جمال وندي يسقي عصافيرو
وتا يكبرو عا مخدة الألوان
ينقودو حبوب الحلا بالسر ويصيرو
طيرين كبرو سوا عا فرشة التحنان
يزيحو قميص الغفا والنوم ويطيرو..!