تغاوى بشروالك وختال..

وكفيّه شراريبا طوال،

وقميص "الستّك روزا"

بترحلك عاهالشروال..

هالطبشات.. العا جيّبي

المحبوكي داير مندار،

قنّص عرّض هالزنار

بتزيدك وهره وهيبي،

وحلوه الهيبه للرجّال!

وهاك الصدريّه الحلوي

سمالله عليها تردّ العين..

فكّلك منها زرّين!

وتغندر ع درب العين،

وقيم الجرّه للحلوي

السمرا الإم عيون كحال...

بهالجزمه رايح جايي

العاملها عندو خبره..

موصّى عليها توصايي

بتبرا الأرض وما بتبرا!

وغمزه من عين السمرا

البتقلّك عالدبكه نزال...

"دبّوسك" راسو هالدُور..

ضرباتك قاتوليّه

غيرك ما بيقعد ناطور

ولا منمضيلو "الشَرطيّه"

صوتك بيهزّ الوديان،

بتتصرصع منّو الرعيان

ورجالك بالضيعه قلال!

وعا رقصة هزّي هزّي

بمحرمتك يا منتوره..

قولي للساحه اهتزّي

عا نغمات المسحوره..

وشوفي حالك واعتزّي

برقصة مشق الزعروره

وهزّات الخصر الميّال!

نحنا اللي منفدي لبنان،

دخاير عنّا تراباتو..

ولبنان جبال ووديان

بيحكي المجد حكاياتو!

العزّ تغنّى بساحاتو،

وحلقة قوّالي صفّين

والردّادي عالميلين

عن مجدو وعن أرزاتو

قوّال يحاكي قوّال...

....

أسعد السبعلي، من ديوان "يا بو جميل"