ينصر دينك يا بطل

قتلت ناس عُزًّل كتير

ستات، شيوخ وكمان عيال

أزحت عنا خطر كبير

دي ناس بتقول الله محبة

والمحبة دي شيء خطير

اقتل بطرس واقتل مينا

اللي إخواتهم ماتوا في سينا

واللي ولادهم رقصوا في فرحك

واللي في ميّتم بيعزّينا

إقتل ماري وطنط تريزا

دول ناس مافيهومشي ولا ميزة

دايماً كده يبتسموا في وشك

ويقولوا أهلاً خطوة عزيزة

واقتل سامي ناجي نجيب

أصل الاسم صراحة مريب

يمكن يطلع واحد منهم

داقق على إيدو صليب

لينا رب اسمه الكريم

ها يجي يوم تعرض عليه

تقف أمامه ويسأل الشخص ده عملك إيه؟

بأي ذنب تقتله

وفين ومين وإزاي وليه؟

إبقى قول لي يا بطل

ها ترد يومها..

وتقول إيه؟”

* كتب الشاعر المصري أحمد فؤاد نجم هذه القصيدة عن تفجير كنيسة القديسين، والقصيدة تتناول الحادث الأليم الذي وقع في كنيسة القديسين بالإسكندرية في ليلة رأس السنة عام 2011، وتنتقد بشدة العنف والإرهاب وتدعو إلى المحبة والسلام.