المشتى يَ دمعة بوح بجفوني
يا ألف شهقة "مرحبا وأهلين"
جَنّة.. بأحلى أهل مسكوني
شربوا الوفا من كل نبع وعين
عصافير متعشعش بزيتوني
وشي درب عم يسأل درب: من وين؟
ضحكت وقالت تقبر عيوني
هون العمر، مع رجعتك، عمرين

خلي الزمان يفل، قالتلي،
ونحنا منرجع متل ما كنّا
ومن عبّها مدّت وشالتلي
مكاتيب، شي منّي وشي منّا
ما في شعر متل اللي بعتتلي
ولا في مغنّي متلها غنّى
من عندها الأشواق وصلتلي
وإلها وصل شو كنت أتمنى

مسكت بإيدي وقالت الحقني
تنروح نبرم عالزمان الكان
أركض وهيي كتير تسبقني
وتعزف الماضي أعذب الألحان
من تحت شجرا لا ورا جفني
عالكرم عالغبيط عالعطشان
سبحان ألله.. كيف ردتني
بهالعمر عا صدرا الطفل عدنان!