سمر حسن: بغَيبتِك غِفي قلبي

بغَيبتِك غِفي قلبي

غرقان بالتّنهيد

إن وعي يكويه النوى.... والملقى مش بالإيد

متل تايه بِصحرا

عطشان بدّو يرتوي

وكل خطوة بُعدو تزيد

عن ميّي، متل موعد عشق

تتمايل

توميله شو بتريد

مش سراب،

عيونه بالدمع رغرغت، ما عاد شاف بعيد

مرت عليها نسمة ضنا

وضنا عيوني على غيابك ما بينفعه تضميد

*

بغيبتك غفي قلبي غرقان بالتنهيد

ان وعي يكويه النوى

متل اللي فايق من حلم

نسيان شو بيريد

أو صاحي من سكرته، والصحوة بعد السكر بتحرق مواعيد

العين تبقى شاردة

تنسج من رموش الوهم

طرقات وعواميد

وعربش على حدود السما

مايردني الوعيد

اسرق من الرب ساعة أمر

تَ لبّسك عمر جديد

وبحضنك اغفى دهر، طفّي هالشوق العنيد

ولمّا تخلص الساعة

وبدّو مني ياخدك

ما إغفلك.

خبّيكي بالوريد

اخطف النور الغني

تَ يتوه بالعتم  وماتوصلك ايد

علق النور نجوم عحيطان الدفا

اسقيكي غيوم

وسنين عمرك زيد

وتبقي بقلبي دافية  تَ يغفى كل العمر

أو إسرقك من جديد