الشاعر المهندس رجا مخائيل لفلوف (عين الباردة)
2024.02.26
د. جودت ابراهيم
تولد عين الباردة ١٩٦٢م، متواجد في جزر الكاريبي، مهندس مدني خريج بلغاريا، يعمل في مجال البناء والطرق، ولديه محل تجاري، بدأ بنشر شعره المحكي في بدايات ٢٠٠٤م، ولديه ديوان باللغة المحكية "عيون وساع"، كما توجد لديه أشعار أخرى معظمها نشر على صفحته الشخصيّة في الفيس بووك... أنواع ونمادج الشعر المحكي في قصائده:
القصيد القصير:
يشتق وزن القصيد القصير من البحر السريع
مستفعلن… /... مستفعلن.. / فعْلُن
او
مستفعلن… /… مستفعلن.. / فاعل
الأم الإله
.............
لمّا إلَهي
عَنّ عَا بَالو
يِخْلُق دنِي
من قَالب خْيالو
تْرَابو عَجَن
تا يعْمُل الإنسان
و أجْمَل أنيس
مْن الضّـلِع شَالو
و عا قدّ ما كَنْ
بالضّـلِع فَـنّان
لَوحات أمّ
تْـكَـوّنو قْبَالو
شَاف النَقِص
بـ الْـقَـالب الْلي كان
يعْجُن حَياة
و غَـيّـر الْـعَـجّـان
عا هَيئِتا
وْ رِجْعِ وْ خَلَقْ حَالو
****
صوتك يا أمي
....................
صوتك يَـ أمّي كَــرّ من بَـكْرَا
خِـيـطان عم تِـتشَـردق بْـ ُبكرا
نَاطر شَهر عا خـطـّك الْـمقطوع
مَــقـْهُــور عـم بـِيـدقّ بالـجـكـرا
صوتك يَـ أمّـي بالْـقَـهـر مَـنْـقـوع
حَاصَرْ ظـُـنوني و صـار يـحتكرا
كونك حزينة ولْ وَطن مـوجـوع
و خَاطرك مَكسور والدني عِكرا
صَوتِك حَزين بْعيد مش مسموع
تْـرَدّد صـدى من بحّـة الـذكـرى
يا قونتي الْ مَ قْدرْت عا شكرا
رْقِينِي بـْحَنانك يا حلم مـمنوع
تـَ يصير عَطفك من خـَمَر إيـمان
إشـرب حَـنينو و تِـخلص الـسكرا
*****
ضلّي ضحكيلي
.......................
ضلّي اضْحكيلي
وْ لَوّني قْلامي
حُبّ وْ شِعِر مِن خَدِّك الشَّامي
وْ نامي عَ صدري
وْ فَيّقِي الْـ أحلام
حلم وْ حلم
تَـ تْروق إيّامي
بَلْكي يا حِلْوِه بْـ تِمرقي عَ الشّام
وْ بِـ تْزَهّري
عَ جْرُود آلامي
وَقْتا يا عُمري اِن رِجْعِت الْـ إيّام
طْقي بْـ كَعْبِك الْعالي
عَ دْراج قلْبي وْ طِقْطِقِي عْضَامي
****
نموذج من الشعر المحكي ب مزج مستفعلن فعلن مع مستفعل مستفعلن فاعل
دَرْب الجلجلة
...................
الْجِلْجِلة صَارت وَطَن
فيها المَهَانة دْروب
آلامْهَا دَمْعُ و حزِنْ
ب قْلوب محْـتِرْقَة
حَمْلِو صَليب الْحَقّ شَرْقَك
يا وَطَن و جْنوب
و شِرْبُوا عَذَاب الْمَوت
و الْهِجْرَان و الفُرْقَة
مَـصْلوب يا شَعْبي الْأبي
عا خشْبِتك مَصَلوب
لا حَامِلاتُ الطيب
مَرّو يعَطّرُو جْرُوحَك
و لا مَجْدَليَة الْيَوم
مَرْقِتْ عَالْقَبِرْ مَرْقَة
****
عطر ايديكي
................
بْشِـقّ برْدَاية فَجَرْ
وبْفوت
عَـ مْرُوج عَينيكي
بْلاقي حَلاكِي مْـرَصّع
بْيَاقُوت
و مْفَصّل عْـلَيكيَ
وْ عطْر السما لْ فوق الدني
مَفْـلوت
مَرْشُوش عا دَيكي
بيعَطّـرن بيعَطّـرن
تيموت
*****
الشروقي:
يوزن الشروقي على البحر البسيط:
مستفعلن فاعلن مستفعلن فاعل
بَـوْسِـة من إيد أمي
......................
يمكن قَدر مَكتوب
تْضلّك بْعيده
و تْـزيد فـرْقـتـنا
غِـرْبِـة سنه جْديده
من وَين بدْنا نْجيب
سْنـِـيـن للـفـرْقـة
ضاع العمر غَـصّـه
مَـع آه تـنْهيدي
وْ كِلْما مَـرَق عيدك
فوق الدني مَـرْقـه
قَـرْمِـيد غِـرْبتنا
بيزيد قَـرْميده
شو بْحبّ يا أمّي شُوفك
وَ لَو سِـرْقـه
بْـ مَـرْقِـة حلم عـالدّار
وْ بوّس بْ إيدك
وْ فِـيـق عا دَمْـعة
عَـم إمْـسحا بْـ إيدي
****
المعنّى:
وزن المعنى هو مستفعلن مستفعل مستفعلن:
"طال المطال"
.......................
يـَ بْلادنا
"لا تنْدَهي مافي حدا"
تْهَجّرو حْبابك سوا
صَوب الشّـمَال
صَوتِك الْـفَـيروز
عَم يرجَعْ صدى
مَخْـنوق عَـ بْـواب المَدى
بْـ حَبل الْمُحَال
وْ جِسْـمِك الْمَـمْدُود
عا قُـوس الرَدا
مَصْلوب صَرْلو سْنين
عا خَشْبة ضَلال
يا شَامنا
عَـ قْيامتِك "طَال المَطَال"
***
مَـمْـنُوع السَـفَـرْ
..................
عْـيونك مَعَابِر حُبّ
عا مَـرّ الزمَان
فِيها وَطَنْ مَرْغُـوب
مِن كل البَشَرْ
لاجئ أنا
عَـ حْـدُود ما إِلها أَمَان
لا تْـغَمّضْي !!
شُو بْخَاف
تِـقْـفِـشْنِي الْـخَـفَـرْ
وْ عَا جَـوَازي
" بَان " مَـمْـنـُوع الـسَـُفَرْ
*****
قرَادي:
الوزن :
فعلن فعلن فعلن فع
او… .فاعل فاعل فاعل فا
فجر وجك
.............
فجرو ل وجـّـك بان عليي
طلعت منـّو الشمس هديّة
ضَللـك حــدّي يا محبوب
صبّح وتمسّى ب عينيي
......
صوتي بأسمك غنّى وصلاّ
سنيني بـقربك عم تـتحـلاّ
عـنـدي أنـتي الـدنـيـا كـُلاّ
دخـلك فيـق و طـلّع فـيّي
****
الكون صغيير
................
طعم القهوة كتير تـغيـير
و طول غيابك فكري حيـّر
لا تـقولي بُعدك محمـول
و غـيابك عنـّي مـعـقـول
كلّ الدنـيـا زعـلت مـنّي
و داق الكون و صار صغيير